दाङको तुलसीपुरमा ३२ वर्षिया महिलालाई सामूहिक बलात्कार प्रयास गरेको आरोपमा तीन जना पक्राउ परेका छन् । बुधबार बेलुका अन्दाजी साढे ६ बजेतिर तुलसीपुर उपमहानगरपालिका १२ कपडादेवी सामुदायिक जंगलमा ३२ वर्षिया महिलालाई सामूहिक बलात्कार प्रयास गरेको आरोपमा तीन जनालाई पक्राउ गरेको इलाका प्रहरी कार्यालय तुलसीपुरका प्रवक्ता पर्वत केसीले जानकारी दिनुभयो।
पक्राउ पर्नेमा तुलसीपुर उपमहानगरपालिका ६ बस्ने २२ वर्षिय दुर्गा बहादुर केसी, तुलसीपुर १२ बस्ने २० वर्षिय अभिषेक चौधरी र सोेही ठाउँ बस्ने १९ वर्षिय तिलक परियार रहेका छन् ।
उनीहरुले ती महिलालाई बलात्कार प्रयास गर्नुका साथै महिलासंग भएको एक तोलाको सुनको सिक्री, एक थान मोबाइल र पाँच हजार नगद रुपैँया लुटेर भागेका थिए । उनीहरुलाई प्रहरीले बिहीबार बिहान तुलसीपुर ६ स्थित राप्ती बबई क्याम्पस नजिकबाट पक्राउ गरेको हो ।
बुधवार बेलुकीको घटना भएपनि शुक्रबार मात्रै किटानी जाहेरी परेकाले सामूहिक बलात्कार प्रयास र डाँकाचोरी मुद्दा दर्ता गरी पक्राउ परेका तीनै जनालाई म्याद थपका लागि दाङ जिल्ला अदालत घोराही पठाइएको प्रवक्ता केसीले जानकारी दिनुभयो ।
बुधबार बेलुकी दाइ नाता पर्नेसँग जसपुर आफन्तको घरबाट फर्किदै गर्दा बेलुकीका करिब अन्दाजी साढे ६ बजेतिर तुलसीपुर १२ गुहारखोला किनारमा थकाई मार्न बसिरहेको समयमा तीन जना युवा आएर उनीसँगै रहेका आफन्तलाई हेल्मेटले टाउकोमा प्रहार गर्दै बन्धक बनाएका थिए ।
महिलालाई बसेको स्थान भन्दा केही पर झाडीमा लगेर निबस्त्र बनाई बलात्कार गर्ने प्रयास गरेको प्रहरीले बताएको छ । तीनै जनाले पालैपालो बलात्कार गर्ने प्रयास गरेपछि महिला चिच्याएको आवाज सुनेर गाउँलेले बलात्कार हुनबाट बचाएका थिए ।