दाङको तुलसीपुरमा नेकपा (एमाले) को चुनाव चिन्ह अंकित झण्डा जलाएको आरोपमा प्रहरीले थप दुई जनालाई पक्राउ गरेको छ।
तुलसीपुर उपमहानगरपालिका५ बिरेन्द्र चोकमा बिहीबार राति करिब साढे ९ बजेतिर भएको घटनासम्बन्धी अनुसन्धानका क्रममा तुलसीपुर ४ हलवारका ३० वर्षीय रमेश राना मगर र तुलसीपुर ६ गाइडरका २४ वर्षीय विक्रम परियारलाई पक्राउ गरिएको जिल्ला प्रहरी कार्यालय दाङले जनाएको छ।
यसअघि तुलसीपुर ७ कालाखोलाका ५५ वर्षीय बुद्धि बहादुर बस्नेत पक्राउ परिसकेका छन्। हालसम्म तीन जनालाई नियन्त्रणमा लिइएको र अन्य संलग्न व्यक्तिको खोजी कार्य जारी रहेको प्रहरीको भनाइ छ।
प्रहरीले घटनाबारे थप अनुसन्धान भइरहेको जनाएको छ। साथै, शान्तिसुरक्षा र सामाजिक सद्भावमा असर पर्ने गतिविधि नगर्न सबैलाई संयमित र जिम्मेवार बन्न आग्रह गरेको छ।
प्रकाशित मिति : २०८२ फाल्गुन ९ गते शनिवार
