नेपाली कांग्रेसका वरिष्ठ नेता रामचन्द्र पौडेल राष्ट्रपतिमा निर्वाचित भएका छन् । बिहीबार भएको निर्वाचनबाट एमालेका सुवासचन्द्र नेम्वाङलाई पराजित गर्दै ७८ वर्षीय पौडेल मुलुकको तेस्रो राष्ट्रपतिमा निर्वाचित भएका हुन् ।
राष्ट्रपतिमा निर्वाचित पौडेलले ३३ हजार ८०२ मतभार प्राप्त गर्दा उनका प्रतिद्वन्द्वी एमालेका नेम्वाङले १५ हजार ५१८ मतभार पाए । पौडेलले प्राप्त गरेको मतभार कुल खसेको मतको ५१ प्रतिशतभन्दा धेरै हो । त्यसैले पौडेल पहिलो चरणबाटै राष्ट्रपतिमा निर्वाचित भएका हुन् ।
पौडेलले संघीय संसदका २१४ सांसदले मतदान गरे । जसको मतभार १६,९०६ हुन्छ । यस्तै उनलाई ३५२ प्रदेश सांसदले मतदान गरे । जसको मतभार १६८९६ हुन्छ ।
यस्तै नेम्वाङलाई संघीय संसदका ९८ सांसदले मतदान गरेका छन् । यसको मतभार ७,७४२ हुन्छ । यस्तै उनलाई प्रदेशसभाका १६२ सांसदले मतदान गरेका छन् । यसको मतभार ७,७७६ हुन्छ । यस्तै पाँच मत बदर भएको छ ।
पौडेल कांग्रेस, माओवादी केन्द्र, राष्ट्रिय स्वतन्त्र, नेकपा एकीकृत समाजवादी, जसपा, लोसपा, नागरिक उन्मुक्ति र स्वतन्त्र सांसदको समर्थनमा उम्मेदवार बनेका थिए । एमालेका नेम्वाङलाई आफ्नो दलको मात्रै समर्थन थियो । संघीय संसदका सांसद र प्रदेशसभाका सांसदहरूले मतदान गरेका थिए ।