दाङको तुलसीपुर–घोराही सडकखण्डअन्तर्गत घोराही उपमहानगरपालिका–१६ स्थित सेवार खोलामा पुल निर्माणका लागि खनिएको खाल्डोमा मोटरसाइकल खस्दा दुई जनाको घटनास्थलमै मृत्यु भएको छ।
लु ०२ ००१ प ११०२ नम्बरको मोटरसाइकल दुर्घटनामा परी मृत्यु हुनेमा रोल्पा त्रिवेणी गाउँपालिका–७ निवासी २८ वर्षीय ज्ञानेन्द्र बुढाथोकी र तुलसीपुर उपमहानगरपालिका–१७ झिंगै निवासी ३९ वर्षीय कमल ओली रहेका छन्।
घोराहीबाट तुलसीपुरतर्फ जाँदै गरेको मोटरसाइकल पुलको पिल्लर निर्माणका लागि खनिएको गहिरो खाल्डोमा खस्दा दुर्घटना भएको हो। दुर्घटना आज बिहान करिब ९ बजे भएको प्रहरीले जनाएको छ।
घटनापछि प्रहरी टोली घटनास्थलमा पुगेर आवश्यक अनुसन्धान सुरु गरेको छ। सडक निर्माणस्थलमा उचित चेतावनी संकेत नहुँदा दुर्घटना भएको हुनसक्ने आशंका गरिएको छ।
प्रकाशित मिति : २०८२ माघ २६ गते सोमवार
