देशकै उत्कृष्ट विद्यालयको रुपमा पुरस्कृत भएपछि मावि तुलसीपुर सेन्टरले आज तुलसीपुर बजारमा उत्सव र्याली निकालेको छ ।
तुलसीपुर उपमहानगरपालिकाका उपप्रमुख स्यानी चौधरी, तुलसीपुर-६ का अध्यक्ष वर्षात भण्डारी, शिक्षक, विद्यार्थी, अभिभावक, विद्यालय व्यवस्थापन समितिका पदाधिकारी, शिक्षक अभिभावक संघका पदाधिकारी एवं शिक्षासंग सम्बन्धित सरोकारवालाको उपस्थितिमा उत्सव र्याली निकालिएको प्रधानाध्यापक भागवत पौडेलले बताउनुभयो ।
तुलसीपुर-६ स्थित विद्यालयको प्रांगनबाट शुरु भएको र्यालीले बजारको परिक्रमा गरेको छ । र्याली गु्रमाह चोक, जेसिज चोक, बिरेन्द्रचोक, उपमहानगरपालिका कार्यालय हुँदै पुन : विद्यालयको प्रांगनमा पुगेर सभामा परिणत भएको हो ।
मावि तुलसीपुर सेन्टर सार्वजनिक विद्यालयतर्फ देशभरीमा प्रथम भएको हो । २०८० सालको माध्यमिक शिक्षा परीक्षामा प्राप्त गरेको नतिजाका आधारमा मावि सेन्टर प्रथम भएको हो ।
विद्यालयलाई बुधबार प्रधानमन्त्री केपी शर्मा ओलीले काठमाडौंमा आयोजित कार्यक्रममा राष्ट्रिय शिक्षा पुरस्कार प्रदान गर्नुभएको थियो । विद्यालयले नगद तीन लाखसहित शिल्ड, ध्वजा र प्रमाणपत्र प्राप्त गरेको छ ।