तुलसीपुर उपमहानगरपालिकाले विपद् जोखिम न्यूनीकरण तथा व्यवस्थापनका लागि तयार गरेको संचार रणनीतिक योजना २०८२ सम्बन्धी छलफल तथा अनुमोदन कार्यक्रम आइतबार सम्पन्न गरेको छ ।
तुलसीपुर उपमहानगरपालिकाकाे आयोजना र ओरेक नेपालकाे सहजीकरणमा कार्यक्रम सम्पन्न भएको हाे ।विपद् जाेखिम न्युनिकरण तथा ब्यवस्थापन संयाेजक एंव वडा नं. ६ का वडा अध्यक्ष दुजमान भण्डारीकाे अध्यक्षता तथा उपमहानगरपालिकाका प्रमुख टिकाराम खड्काकाे प्रमुख आतिथ्यतामा कार्यक्रम सम्पन्न भएको थियो ।
कार्यक्रममा उप–प्रमुख स्यानि चौधरी, प्रमुख प्रशासकीय अधिकृत केशवराज पार्धे, नेपाली सेना, नेपाल प्रहरी, विभिन्न राजनीतिक दलका प्रतिनिधि, महिला समूह, युएन वुमनका प्रतिनिधि, विभिन्न संघ–संस्थाका पदाधिकारी र सरोकारवालाको उपस्थिति रहेको थियो ।
कार्यक्रमका सहजकर्ता श्रमलाल चौधरीले तुलसीपुर उपमहानगरपालिकाको विपद् जोखिम न्यूनीकरण तथा व्यवस्थापन संचार रणनीतिक योजना २०८२ प्रस्तुत गर्नुभयो । प्रस्तुत रणनीतिमा राष्ट्रिय नीति तथा कार्ययोजना, तुलसीपुर उपमहानगरपालिकाको नीतिगत व्यवस्था, विपद् व्यवस्थापनका चुनौती र अवसर, र सरोकारवालाबीचको संचार समन्वयका विषयहरू समेटिएका छन् ।
उपमहानगर प्रमुख टिकाराम खड्काले सो रणनीतिक योजनाले उपमहानगरपालिकाको आगामी कार्ययोजनालाई स्पष्ट दिशानिर्देशन गर्ने बताउनुभयो । उहाँले भन्नुभयो- “विपद् जोखिम न्यूनीकरणका कामहरू योजनाबद्ध रूपमा अघि बढाउन संचार नीति अत्यन्तै जरुरी छ । यो दस्तावेजले नीति र व्यवहारबीचको समन्वयमा टेवा पुर्याउनेछ ।”
त्यस्तै उप–प्रमुख स्यानि चौधरीले कुनै पनि समयमा विपद् आइपर्न सक्ने भन्दै सबैलाई सतर्क र जिम्मेवार बन्न आग्रह गर्नुभयो । तुलसीपुरसहित देशभरका धेरै सरकारी संरचनाहरू क्षणभरमै ध्वस्त भएको प्रती दुख ब्यक्त गर्दै भन्नुभयो – विपद् आउँदैन भनेर नसोची, हामी सबैले सचेत, चनाखो र तयारी अवस्थामा रहनुपर्छ ।”
प्रमुख प्रशासकीय अधिकृत केशवराज पार्धेले दस्तावेज अझ स्पष्ट र कार्यान्वयनमुखी बनाउन सुझाव दिनुभयो । उहाँले भन्नुभयो, “रणनीतिमा प्रत्येक शीर्षक र उपशीर्षकले के सन्देश दिन खोजेको हो भन्ने कुरा स्पष्ट हुनुपर्छ । प्रभावकारी संचार नीति बनाउनका लागि संकेतात्मक मात्र होइन, व्यवहारिक रणनीतिहरू पनि समावेश हुनुपर्छ ।” साथै उहाले दस्तावेजलाई कानुन, ऐन र विद्यमान नीतिहरूसँग सुसम्बद्ध गर्नुपर्ने, आवधिक मूल्यांकन प्रणाली राख्नुपर्ने र प्रभावकारिताको मापन गर्न सकिने व्यवस्था गर्नुपर्ने सुझाव पनि दिनुभयो ।
कार्यक्रममा स्वास्थ्य शाखाका विमल केसी, महिला तथा बालबालिका शाखा प्रमुख माया श्रेष्ठ, रुक्मणि महर्जन लगायत अन्य सहभागीहरूले पनि विभिन्न सुझावहरू प्रस्तुत गरे । उनीहरूले नियमित सूचना प्रवाह प्रणालीलाई अझ सशक्त बनाउन, प्रदेश सरकारले पठाएका सूचना वडा–वडामा समयमै वितरण गर्न, विपद् व्यवस्थापन समितिलाई पुनर्संरचना गरी अधिक समावेशी बनाउनुपर्ने सुझाव राखे ।
सहभागीहरूले विपद् व्यवस्थापनका क्षेत्रमा संचारलाई प्राथमिकता दिएर मात्र प्रभावकारी समन्वय सम्भव हुनेमा जोड दिए । उनीहरूले समुदायमा सचेतना, पूर्वतयारी र समन्वय अभावले ठूलो क्षति हुने भएकाले स्थानीय तहबाटै सशक्त अभियान चलाउनुपर्ने धारणा राखे । यस्तै रणनीति समितिमा महिलालाई अनिवार्य रुपमा समेट्नुपर्ने सुझाव दिए ।
कार्यक्रमको सहजीकरण ओरेक नेपालकी कल्पना चौधरीले गर्नुभएको थियो ।
