राष्ट्रिय सभामा पेस भएको सामाजिक सञ्जालको सञ्चालन, प्रयोग तथा नियमन गर्ने सम्बन्धमा व्यवस्था गर्न बनेको विधेयकलाई मानव अधिकार तथा शान्ति समाजले ‘प्रतिगामी विधेयक’को संज्ञा दिएको छ ।
बुधबार समाजकि केन्द्रिय सभापति रेनुका पौडेलको अध्यक्षतामा सम्पन्न केन्द्रीय कार्यसमितिको बैठकले उक्त विधेयकका केही प्रावधान संविधान प्रदत्त मौलिक हक, प्रेस र अभिव्यक्ति स्वतन्त्रताको मर्म विपरीत दुरुपयोग हुन सक्ने खतरा रहेकोले सोको विरुद्ध देशव्यापी अभियान सञ्चालन गर्ने निर्णय गरेको हो ।
समाजले सरोकारवालाहरूसँग व्यापक परामर्श र सहमति पश्चात् मात्र विधेयक अघि बढाउन आग्रह गरेको छ ।
यसैबिच समाजको केन्द्रीय कार्यसमितिमा ६ जना सदस्य मनोनीत भएका छन् । जसमा नम्रता खरेल, रुपा पुडासैनी, सीता यरी, रोजिना विष्ट, रत्ना कँडेल र मणिराम दाहाल रहेका छन् ।
यसैगरी अनुशासन समितिको संयोजकमा पूर्व वरिष्ठ उपसभापति कृष्णबहादुर रावल र सदस्यहरूमा दिलबहादुर कार्की र प्रतिमा महतोलाई नियुक्त मनोनीत गरिएको छ ।
यस्तै सदस्यता अपिल समितिको संयोजकमा पूर्व कोषाध्यक्ष किरण ढकाल र सदस्यहरूमा खिम (कृष्ण) भट्टराई र सानु लामा मनोनीत भएको समाजका महासचिव प्रकाश शाहिले जानकारी दिनु भएको छ ।